個人網誌

自從復工後，奶量就不斷減少 由6 oz變3 oz，由3 oz 變2 oz 最近仲由2 oz變30 ml 而Period期間，奶量就更少 雖然減產後，一直抱住餵得幾耐得幾耐嘅心態 但眼見奶量跌到近乎零嘅時候 心情真係down down down 我嘅人奶路目標非常清晰 希望持續母乳餵哺至胡小姐2歲 因此我親住自己有長假期，便展開一連7日嘅追奶路 上網睇過不少追奶或上奶方法 例如：飲黑豆水、黑豆漿、木瓜魚湯 食白飯、花生、黑芝蔴或其他上奶食物 不過效果都係因人而異，不同體質有不同效果 暫時我覺得最有效，而且任何人都一定會成功嘅方法 就係刺激乳房 多刺激乳房，讓身體製造更多奶水 刺激乳房 之 增奶方法： 1)增加埋身餵哺次數 2)增加泵奶次數 3)Power Pumping增奶法 交代少少背景先 胡小姐已經一歲，加咗兩餐固體 每日飲3次奶，早、午、晚，三餐 而我，需要輪班工作，工作及休息時間唔穩定 以我嘅情況，我無可能做到方法1及2 故此，我只能用Power Pumping 什麼是Power Pumping？ 不斷頻繁泵奶，令乳房接收大量短而密集嘅刺激訊息 模仿BB吸吮，製造假像，令大腦從而分泌更多母乳 Power Pumping 有3個不同頻率泵奶方法： 1) 泵20分鐘 休息10分鐘 泵10分鐘 休息10分鐘 泵10分鐘 完 2) 泵10分鐘 休息10分鐘 泵10分鐘 休息10分鐘 泵10分鐘 完 3) 泵5分鐘 休息3分鐘 泵10分鐘 休息3分鐘 泵5分鐘 完 *資料來源：職場奶媽攻略 Catherine Chow著 建議一日至少做4次，但我因為工作關係 每日只能在固定時間做1次 而我採用咗Power Pumping 嘅方法2 方便又易操控 由於胡小姐已戒夜奶（偶然半夜醒咗都要食奶） 因此我選擇凌晨兩點做Power Pumping  因為懶，半夜起身，直接泵入奶袋 泵完只清潔奶泵就可以了 Day 1 奶量只有幾滴 Day 2 增加了少許 Day 3 再增加了少許 Day 4 - Day 7 每日都...

胡小姐第一次生病，正正就係佢正日生日嗰一晚 凌晨點半，胡小姐喺半睡半醒狀態下叫咗兩聲 起初我亦不以為意，打算幫佢換尿片之際 一抱起佢，發現佢全身好興 媽媽嘅直覺話我聽，胡小姐有唔妥 立即幫佢探熱，omg，發燒燒至39.1度 好彩屋企有退燒藥看門口，即刻同胡小姐食藥 脫咁啲衫，貼退熱貼，散熱 食完藥，胡小姐好快瞓著咗 我原本打算繼續瞓，但點知成晚籮籮攣瞓唔著 胡小姐食咗兩次藥，到第二朝8點仲未退燒 我覺得事態嚴重，需要睇醫生 當日係星期日，睇開嘅家庭醫生無開 而且咁早又未有診所開診 我同胡生決定搭的士去最近嘅醫院睇急症 點知急症室要等over 8 hrs 我哋就即刻去法國醫院睇門診 去到法國醫院，因為無乜人 等咗一陣，好快有得睇 醫生建議做流感快速測試 結果，胡小姐確診患上甲型流感 醫生開咗退燒藥、收鼻水藥同特敏福 等攞藥嗰時，胡小姐見到其他小朋友 仲同佢哋say hi，病都仲咁好精力 真係比佢吹脹 好彩胡生胡太發現得早，立即求醫 胡小姐及時得到適當嘅治療，無需住院 服用5日特敏福後，已經痊癒 病咗幾日，總算好返晒，精神返 生病樣 VS 精神樣 所以小朋友唔舒服，真係病樣睇

時間飛逝，眨下眼，胡家小姐已經一歲啦 小朋友真係大得好快 上年嘅今日，胡小姐仲係食屙瞓 今日，佢已經識行識爬，作為媽媽嘅我 感到好安慰，亦好感觸 相信好多媽媽都希望以母乳餵餔小孩 我亦不例外，一直堅持母乳餵餔胡小姐 即使胡小姐出世後有黃膽，持續至出生後3個月才退黃 我都堅持以全母乳餵餔 幸好得到公司嘅配合 我可以休假至胡小姐8個月才復工 否則全人奶路，唔會咁順利 我諗我算係富媽媽，曾經打爆過成個冰格 冰奶多到整壞咗個雪櫃 雖然冰過嘅人奶，營養價值不及新鮮人奶 但冰奶嘅成份及營養，一定點都好過奶粉 為免日後復工，奶量減少 因此，即使我知道冰奶營養不夠好 我都仍然儲存大量冰奶作儲備 好彩胡小姐乜奶(埋身、奶樽、冰奶、雪奶)都肯食 係個合作嘅乖寶寶，一滴奶都無曬 亦無百費媽媽嘅心機 Day 1 到現在，我嘅人奶路尚算順利 無經歷過塞奶、石頭胸、乳線炎等狀況 當然，當中仍有不少辛酸血淚，在此就不提啦 由胡小姐2個月開始，至我復工前 每晚臨瞓前都會用奶樽食母乳 而我就會用奶泵泵奶 (每日最少泵一次) 其餘時間，胡小姐都係埋身食 一來可以訓練胡小姐用奶樽食奶 二來我嘅身體亦可以適應用奶泵泵奶 為日後復工作準備 ＊因為長期埋身，身體唔適應，有機會唔受泵 所以我每日至少會用奶泵泵一次＊ 泵奶過程亦好順利，每次 單邊 都有 7 oz 以上 最高紀錄試過 單邊 10 oz (1枝大奶樽都裝唔晒) 每次泵奶見到自己嘅奶量，都好安慰 好安慰自己有足夠嘅奶水，能夠提供足夠嘅營養比胡小姐 亦覺得自己一直以來嘅堅持係值得嘅 自復工後，如我所料，奶量漸漸減少 冰格嘅存貨，已被胡小姐清空 初期復工授訓，奶量由 雙邊 8 oz 跌至 6 oz 其後因為體重激跌10磅，令奶量由 雙邊 6 oz 跌至 3 oz 現在就只剩餘 雙邊 2 oz 起初見到奶量不斷下跌 心情超down，極度depressed 但仔細想，當時胡小姐已經11個半月 全人奶路走到11個半月已經好叻 補奶粉也並不是一件壞事 因此購買咗第一罐奶粉比胡小姐食 雖然奶量只剩餘 2...

阿女出院當日，姑娘話BB一切正常，無黃疸 我就一直大安旨意，以為阿女唔會有黃疸 但原來黃疸一般喺BB出世第3日後出現 我約咗阿女出院第二日(即係出世第5日)去健康院磅重、洗臍帶 當日陪月望到阿女面色，已經話佢塊面黃 初時我都唔相信 直至姑娘check阿女心口，話佢黃疸指數偏高，我先相信 而且體重仲輕過出院，跌咗0.01kg 等見醫生嘅時候，我個腦一片空白，完全唔知點做 食奶前指數：252，食奶後：23x 由於我係全人奶餵哺，醫生話阿女黃疸指數偏高可以考慮補奶粉 一直希望以全母乳餵哺，唔想阿女食奶粉 我個腦再次一片空白 返到屋企，胡生即刻問人邊隻奶粉好 想比阿女食，亦9秒9買咗返嚟 而我問咗幾位全母乳餵哺嘅媽媽，佢哋都經歷過依個階段 吸收咗佢哋嘅經驗，我堅持餵母乳，唔補奶粉 陪月知道我嘅想法後，燉湯比我補身，再煲上奶湯我飲 亦叫我準時餵阿女食奶，即使阿女瞓咗都要叫醒佢食 經過一星期，日以繼夜，夜以繼日 無間斷，餵奶、掃風、換片，無限輪迴 阿女嘅黃疸指數由23x，跌到166 醫生話黃疸指數合格，唔洗覆診，一個月先返嚟打針 塊面都無之前咁黃 當唐覺得自己無白費心機，嗰個星期真係堅辛苦 加加埋埋每晚瞓唔夠6個鐘，每兩個鐘餵一次奶 兩個鐘係由食嗰刻開始計，半個鐘食奶 10-15分鐘掃風、換片，5-10分鐘喚醒寶寶 所以計計埋埋，個零鐘又要無限loop 因為阿女鐘意瞓覺多過食，加上黃疸指數已經合格 所以我不定時餵奶，等佢肚餓先比佢食 點知滿月嗰時再返健康院，黃疸指數：155 原來阿女仲未退黃，醫生就寫紙佢返QE抽血 上次醫生講到唔清唔楚 話阿女黃疸指數合格，唔洗返去覆診 令我誤以為阿女已經退咗黃 嗰刻嘅心情真係跌到落谷底 原來黃疸指數over 300為之超標 Under 180叫合格，under 70叫退黃 但當時醫生完全無話我聽 由於阿女未退黃，我又要好似之前咁 兩個鐘頭餵一次奶，食得多屙得多先快退黃 因為有黃疸嘅B鐘意瞓覺，好多時阿女食食下瞓著 叫佢又唔醒，嗰下真係令我好忟好焦急 返QE抽血前，胡生幫阿女申請咗公務員家屬身份 咁阿女就可以...

阿女出世後，我同胡生發現阿女好多嘢都同喺我個肚時一樣 不論樣貌、動靜、pose，都係完全一樣樣 真人VS 超聲波相 絕無掉包，超攪笑 唔知其他BB係咪都係咁呢？

喺產房等咗個零鐘，我同BB終於可以落產後病房 胡生攞埋我嘅個人物品跟埋落嚟 我被安排住2人房，落到產後房，姑娘先幫BB沖涼 胡生安置好我嘅個人物品，逗留多一陣就離開 接著落嚟，開始新手媽媽湊B之旅 生完已經無晒力，加上私處有傷口 我都唔係好敢郁，只係臥床休息 而喺生完BB後嘅6個鐘內(即before 9am) 一定要去第一次小便，否則要插尿喉放尿 媽咪千叮萬嚀我要飲多啲水，否則插尿喉會好痛 所以我落到產後房，休息咗一輪 先飲滴雞精，補一補，之後就狂飲水 終於喺9am前去咗第一次小便 然後姐姐幫我洗傷口，執好床鋪，姑娘比返阿女我 但好可惜，個零鐘後，我落床去完廁所，頭暈到hi hi  暈到要坐wheelchair，由姐姐推我返房 姑娘見我暈到咁，就幫我照顧住BB先 我無事先再比返阿女我照顧 初為人母 之 超人力量 以前未做媽媽之前，好驚抱初生B 覺得佢哋又冧又軟又細粒，好驚整親佢哋 但喺醫院生完B唔夠6個鐘，換片、餵奶、哄瞓覺 乜都要自己嚟，絕對無得驚 仍然超記得第一次由床仔抱阿女上手嘅感覺 一鼓不知明力量，令我諗都唔諗，一手抱起咗阿女 抱上手後，覺得阿女都唔係好軟冧冧啫 其後仲愈抱愈上手添 寶寶要睡保溫箱 喺醫院期間，阿女因為體溫低於37度 手腳冰凍，兩次要入保溫箱 直至體溫上升到正常溫度，姑娘先比返我照顧 每更姑娘都會幫BB探熱，但阿女體溫都係marginal 姑娘就叫我攬實啲佢，等佢感受到阿媽嘅體溫 不過仍然無幫助，阿女啲手腳都係凍 阿女不但身型似我，連手腳冰凍都似埋 新生兒代謝病篩查 所有喺QE出世嘅BB，都可以免費進行新生兒代謝病篩查 父母可以及早知道BB會否患有先天性代謝缺陷同智力發育遲緩 阿女出世第二日，姑娘喺佢腳底抽血 兩星期後無收到電話，即代表BB無問題 政府醫院嘢，你懂的呢 政府醫院生B也不錯 政府生B嘅好處就係有好多湊B支援 喺住院期間，差不多每日都有湊B workshop 母乳教授、沖涼示範，只要向姑娘報名就ok 岩晒我哋依啲新手媽媽 我的黃金初乳 陀梗阿女嗰時，睇過一本醫院派嘅小冊子 BB...

當日去廁所發現見紅，嘴角不禁微微向上笑 終於可以卸貨，而且唔需要催生 入院後，靜待阿女嘅來臨 6:30pm 開始feel到輕微經痛，我即刻用apps count宮縮 keep住5分鐘陣痛一次，每次痛30-50秒 10:30pm 陣痛次數密咗又長咗，每3分鐘痛一次，每次痛50-60秒 我同姑娘講，姑娘話因為我係第一胎，陣痛維持1分至分半鐘再通知佢哋 1:30am 都係keep住3分鐘痛一次，但痛嘅時間再長咗，1分鐘-分半鐘 我就行去護士站通知姑娘，然後上返床，姑娘幫我check宮頸 誰知我1度都未開，不過宮頸鬆軟 當時心諗：下，痛到咁都未開度數，仲要痛到咩程度先生得 之後姑娘攞咗紫色袍比我，叫我換定衫，又比咗暖豆袋我敷 2:00am   按call bell，再次呼喚姑娘 嗰時超級超級超級肚痛，好想姑娘幫我再check宮頸 但佢好快走咗，無幫我check到 而我痛到飆晒汗，典嚟典去，最後要坐喺到先無咁痛 2:30am 痛到不禁呻吟，ee air air，cici sasa 今次姑娘主動過嚟，問我係咪好痛 然後再幫我check宮頸，原來已經開到3度 可以種豆，之後上產房 我即刻打電話通知胡生，whatsapp媽咪 雖然痛，但我仍然超級清醒 姐姐推我上產房嘅時候，我跌咗副眼鏡落地下 反而姐姐唔知，我同佢講，佢先見到，行返轉頭幫我執返 2:40am 上到產房，姑娘叫我過床 但嗰刻真係好Q痛，我話：等陣，痛埋先 姑娘話：過嚟有得吸笑氣，唔過就無得吸 痛完嗰下，即刻過床，姑娘話比我聽笑氣位置 當我想吸嘅時候，姑娘鬧鬼我：自己揸住呀 好鬼惡死 吸咗幾下笑氣，姑娘見我唔識吸 糾正咗我，試咗幾次先掌握到 第一次吸笑氣，覺得佢陣味勁似腸仔 當姑娘settle好所有嘢，所有人走晒 得返自己一個孤令令喺產房 2:45am 姑娘喺門口話胡生已經到咗，可唔可以比佢入嚟 當時又痛，又吸梗笑氣，想講嘢都講唔到 之後仲要比姑娘話：你答我先得架 我心諗，我唔係唔想答你，我答到先得架 3:00am 已經無咗肚痛嘅感覺，但換嚟嘅係超級超級想屙pu 我知道未開夠...

懷孕期間，我曾經出現不明原因出血流啡 喺QE產檢嘅時候，醫生多次叫我38週入院催生 而我一直都非常抗拒催生，希望阿女順其自然地出世 至於私家嗰邊，一路都有定期檢查 阿女情況亦非常穩定，私家醫生話其實可以唔喺38週催生 加上阿女又未落晒盤，因此我同胡生只有靜待阿女嘅來臨 2018年1月5日 EDD係2018年1月8日，距離預產期只剩餘3日 愈近預產期，我就愈想阿女快啲自然地出世 因為我真係唔想催生 當日10點起身，準備去QE做最後一次產檢 但去廁所嗰時發現見紅，立即通知胡生 然後沖涼洗頭，食埋飯，洗埋碗，攞走佬袋 慢條斯理咁叫媽咪陪我搭的士入院 因為見紅，我直接上產房，連產檢都無去 12點上產房登記，磅重、核對文件、聽BB心跳 嗰時開始有好少好少嘅經痛感覺 姑娘準備我嘅入院文件，比咗生產同意書我簽 亦幫我排隊上私家病房，但當時私家房未有床位 我要先入住普通病房 說時遲那時快，胡生都到咗 姑娘整理好文件，我哋就一齊落普通病房 當時正正係中午探病時間，媽咪同胡生都可以自由進出病房 姑娘叫胡生幫我到地下辦理入院手續 我就換衫、驗小便，駁胎心機，聽BB心跳 探病時間結束，胡生同媽咪離開 我就睇下書仔，打發時間 期間又去咗玩fit ball，喺fit ball房識咗位孕媽媽 佢都係見紅入院，但已經入咗院3日都未生得 嗰刻令我好驚訝，好驚自己都會好似佢咁 而令我更驚訝嘅係，佢已經係第三胎 下，第三胎都痛咗3日，咁我點算？ 玩完fit ball，休息多陣胡生再過嚟睇我 由於唔係探病時間，胡生唔入得病房 我出咗去搵佢，落樓下行下，喺Pacific Coffee買咗件cake同熱朱古力 胡生陪到我7點，佢就去比賽，比完賽再過嚟 至於醫院嘅dinner，我無食到，等胡生比完賽買Mos Burger比我食 當日我已經有預感半夜生，所以夜晚食飽飽 準備長期作戰

經同事介紹下，我轉咗另一個私家產檢醫生 一來平啲，二來有3D超聲波照 每次照完，仲會燒返所有相比返隻CD你 以我咁精明又咁精打細算，唔係唔轉醫生呀嘛 23 weeks 阿囡臉尖尖、鼻高高、咀細細，勁似我 當時仲未夠1磅 27 weeks 阿囡塊面已經有啲肉，下巴仲係尖 但個鼻就勁似胡生，攪到我勁唔開心 32 weeks 阿囡表情多多，又豬咀，又打喊露 肚圍細咗一週，對腳就長咗一週 身型似我，但個樣愈嚟愈似胡生，真係傷心到一個點 35 weeks 依次產檢，阿囡唔太合作，隻手遮住雙眼 不過好彩，仲睇到少少 37 weeks 由於阿囡仲未落盤，仲可以清楚咁見到佢個樣 而且仲瞓得好舒服，塊面浪咗係隻手度 但個鼻真係愈嚟愈似胡生，勁大鼻，唉 醫生預計阿囡出世有7磅 39 weeks 如無意外，依次係最後一次私家產檢 最後一次喺超聲波見阿囡 阿囡喺我肚裏面成長得好好 至於我嘅身型，經常被人誤以為陀仔，但查實係囡嚟嘅 媽咪話佢陀我嗰時都係咁，所以我都係遺傳媽咪嘅 臨尾嗰個月，個肚大得勁快 由初初6個月先見肚，到9個月嘅時候，勁大肚 不過細肚有細肚嘅好，陀嘅時候，條腰無咁辛苦