我的懷孕初期經歷

懷孕頭1個月，食得瞓得，唔算大食

反而我覺得自己細食咗，好易飽

但每隔兩個鐘就會肚餓，所以嗰期都係少食多餐

初期我仲有食魚生、壽司

但後來知道對自己同BB唔好，就開始戒口

我亦上網搵咗啲孕婦餐單，希望自己食得健康兼有營養

初初都想跟足營養餐單咁食

但到孕期第2個月，害喜現象終於出現

頭暈、頭痛、作嘔、無胃口、超醒瞓等

幸好我只係想嘔，無真係嘔，否則一定勁辛苦

懷孕初期，我亦有少少抑鬱，喊過一兩次

當時諗埋一邊，結咗婚，搬咗出嚟住，咩都要自己攪掂

而且居住地方唔方便，附近無商場、街市

只得一間餐廳同supermarket，但需要步行15分鐘先到

一來一回就需要半個鐘

覺得自己好慘，肚餓要自己買自己煮

煮完無胃口食，唔食就掉(其實好浪費)

肚餓又食唔落，餓得滯又想嘔

所以嗰期好depressed，不過好快比我諗到解決辦法

作嘔、無胃口，依啲情況反反覆覆咗2個月

踏入孕期第3個幾月就無再出現，好返好多

不過都keep住頭暈頭痛，試過差啲暈底

天旋地轉，睇嘢有星星，要平瞓先無事

懷孕頭3個月，我都無返工，一直請病假

日日喺屋企，超爽皮，又有咖哩陪住我

每日起身吸完塵就放佢出嚟玩

定時定候帶佢落街散步

有咖哩喺到，即使日日喺屋企都唔覺得悶

我仲放假放到唔想返工添