唐氏綜合症檢查 Panorama Test (11 weeks)

我絕對係一個懶到出汁嘅準媽媽

人哋啲媽媽會不停上網、討論區睇好多懷孕育兒資料

但我每日都係上網睇孕婦裝，貪靚到呢

唐氏綜合症檢查聽就聽得多，只係知check bb有無唐氏綜合症

其他資訊一概唔知，亦無自行上網搵資料

所有資訊都係嚟自私家產檢醫生

據我私家產檢醫生所講，Check唐氏綜合症有3個方法

第一種，最準確，但最危險

打枝針入去抽胎水，有機會刺穿羊膜

令胎兒有生命危險，大部分人都唔會做

第二種 Oscar Test，準確度8成，較安全

抽血檢驗，政府產檢會免費幫孕婦做

所以唔洗自費做

第三種 Panorama Test，準確度99%，較安全

抽血檢驗，check唐氏、愛德華氏症、巴陶氏症

仲可以知道胎兒性別，需自費，而且費用較貴

同胡生商量過，除咗做政府嘅Oscar Test之外

我哋決定自費做埋Panorama Test，費用都幾貴下，$6500

不過為求買個安心同快啲知道BB性別，都值得嘅

當日胡生要返工，我獨自到診所抽血

去到診所已經好唔舒服，頭暈到不得了

由8 weeks開始，就經常頭暈

企喺到超過5分鐘就暈，一定要平瞓先唔再暈

醫生話正常，好多孕婦都會咁，係害喜徵狀，叫我唔洗擔心

今次純抽血，抽咗兩枝血去化驗

19 Jun 抽血

26 Jun 有result

所以檢測都屬low risk，而且BB係女

最開心嘅就係胡生，胡生一直都想生女

知道係女之後，佢成日嗌住「阿妹，阿妹」